Arkitektura

Joan Santuen parrokia. Bilbo

Joan santuen eliza, estilo barrokokoa, Bilboko Zazpi Kaleetako Gurutze kalean kokatzen da. Jesusen Lagundiak hasi zuen berau eraikitzen 1622.ean, Domingo Gorgollak egindako dohaintza bati esker. Lanak Ramirez Aita jesuitaren zuzendaritzapean egin ziren. 1624.ean, Martin Ibañez Zalbide maisu harginak hartu zuen esku lan hauetan. Jesusen Lagundiaren artxiboan den dokumentazioaren arabera, Henao aitak testifikatzen du ezen, 1636.ean, parrokia amaituta dagoela oso-osorik. Hala eta guztiz, tenpluaren behin betiko eraiketa ez zen 1675. arte amaitu. 1673.ean, Mateo Rio eta Manuel Cevallos maisu harginak kontratatu ziren, ordura arte altxatutakoa imitatuz, burualdea eta gurutzadura-aldea eraiki ditzaten. Geroago, 1675.ean, Francisco Elorriaga kontratatu zuten gangen gauzatzeko. 1767. urtean, jesuiten erauzketa jazo zen. Bi urtetara, 1769.ean lekuz aldatu zen Joan santuen parrokia historikoa -San Joan Bataiatzailea eta San Joan Ebanjelista- San Andresen ikastetxera. 1874.ean, eraikinak armada karlistaren bonben ondorioak jasan zituen. XX. mendearen hasieran, barruko eremua zabaltzeko erabakia hartu zen, barruko kaperak alboetako nabeekin batuz. 1983. urtean, premiazko zaharberritzea behar izan zuen, bizkaitar hiriburuak nozitu zuen uholde suntsitzailearen ostean.